هه‌واڵه‌كان

د. هێمن غەنی سەعید، مامۆستا لە کۆلێژی بەرێوەبردن و ئابووری، بەشی دارایی و بانك توێژینەوەیەکی ئاست بەرزی لە سپرینگ نەیجەر لینك (Spring Nature Link) بڵاوکردەوە، ناونیشانی توێژینەوەكە بریتییە لە ڕەهەندە ئەخلاقی و فەلسەفییەکانی سیاسەتی بەعس بەرامبەر بە کورد (The Moral and Philosophical Dimensions of Ba’athist Policy Toward the Kurds) هاوكات توێژینەوەكە وەك چاپتەری حەوتەم لە کتێبی سەدەیەک دەوڵەتسازی لە عێراق: بەغدا، کوردستان، و پەرەپێدانی دەستوور (A century of state-making in Iraq: Baghdad, Kurdistan, and the development of the constitution) بڵاوكراوەتەوە. 

شیاوی ئاماژەیە، توێژینەوەكە پەیوەستە بەو لێكدانەوەیەی؛ كە بۆچی پرسی كورد لە سەروەخت و سەردەمی حوكمڕانی بەعسدا درێژەیكێشا و كوردیش دەستیدایە تێكۆشانێكی نەپساوە لە ئاست ئەم حوکمڕانیدا. توێژینەوەكە دید و تێڕوانینە فەلسەفییەکانی هەر یەكە لە "فەیلەسوفی ئەڵمانی، ئیمانۆێڵ كانت، و فەیلەسوفی ئینگلیزی، جۆن لۆك"ی كردۆتە بنچینەی خوێندنەوەی سیاسەت و ڕێچكەی زیانبەخشی پیادەكراو لەلایەن ڕژێمی بەعسەوە، بە تایبەتی ئەوەی پەیوەستە بەوەی چۆن بەڵێنەكانی ئەم ڕژێمە لە ئاست كورد و چارەسەركردنی كێشەكەیدا، بەڵێنی ساختە بوون، كە ئەمەش هۆكارێك بوو بۆ ئەوەی عێراق دەرفەتی ئەوەی لە دەستبدات ببێتە وڵاتێكی ئارام و گەشەكردوو. 

لە هەمان كاتدا، باس لە شكستی حكومەتەكانی عێراق لە پابەندبوون بە جێبەجێكردنی دەستووری 2005ی عێراقەوە كراوە، كە لەم دەستورەدا چەندین مافی بۆ كوردی تێدا چەسپێنراوە.

بۆ زانیاری زیاتر لینکی توێژینەوەکە و كتێبەكە لەم بەستەرەی خوارەوە دانراوە:

https://link.springer.com/chapter/10.1007/978-3-031-76029-7_7