سه‌رۆكی زانكۆی سه‌لاحه‌دین له‌گه‌ڵ كۆمه‌ڵێك له نوێنه‌رانی زانكۆ نێوده‌وڵه‌تیه‌كان.
ئه‌مڕۆ شه‌ممه رێككه‌وتی 21/4/2018، له سه‌نته‌ری كۆمه‌ڵایه‌تی و رۆشنبیری و كۆمه‌ڵایه‌تی زانكۆ، زانكۆی سه‌لاحه‌دین میوانداری كۆبوونه‌وه‌ی ساڵانه‌ی ئه‌نجوومه‌نی زانكۆ نێوده‌وڵه‌تییه‌كانی كرد، كه ساڵانه هه‌رجاره‌و له وڵاتێك ئه‌م كۆبوونه‌وه‌یه ساز ده‌كرێ، كه پێكهاتووه له كۆمه‌ڵێك له زانكۆكانی وڵاتی توركیا و قوبڕس و عێراق و كوردستان. له ده‌ستێكی كۆبوونه‌وه‌كه‌دا دكتۆر ئه‌حمه‌د دزه‌یی سه‌رۆكی زانكۆی سه‌لاحه‌دین خۆشحاڵی خۆی بۆ میواندارییه‌كه‌ی ده‌ربڕی و گوتی: به‌شانازییه‌وه ئه‌مڕۆكه زانكۆی سه‌لاحه‌دین شه‌ره‌فی ئه‌م میواندارییه نێوده‌وڵه‌تییه‌ی پێبڕا، كه مه‌به‌ستمانه له‌م رێگه‌یه‌وه په‌ره به په‌یوه‌ندییه ئه‌كادیمی و زانستییه‌كانمان بده‌ین. بۆیه ئه‌مڕۆكه به‌خۆشحاڵییه‌وه له رێگه‌ی كونسوڵی گشتی توركیا توانیمان دووباره درێژه به په‌یوه‌ندییه‌كانمان بده‌ین و درێژه به‌و په‌یوه‌ندییه ئه‌كادیمیانه بده‌ین كه وه‌ك ساڵانی پێشوو له‌گه‌ڵ زانكۆكانی وڵاتی توركیا هه‌مان بوو. له‌لایه‌كی دیكه‌وه سه‌رۆكی زانكۆی سه‌لاحه‌دین گوتیشی: له‌و میواندارییه زیاتر تیشك ده‌خه‌ینه سه‌ر په‌یوه‌ندیییه ئه‌كادیمی و زانستییه‌كانمان، به‌تایبه‌تی له بواری خوێندنی باڵان و سازدانی كۆنفرانسی زانستی و ئاڵوگۆڕكردنی مامۆستا و قوتابیان له نێوان زانكۆكانی ئه‌ندام و زانكۆكانی توركیا و دووباره به‌ستنه‌وه‌ی په‌یوه‌ندی له‌گه‌ڵ ئه‌نجوومه‌نی خوێندنی باڵای وڵاتی توركیا.
هه‌ر له كۆبوونه‌وه‌كه‌دا ئۆرهان حیكمه‌ت عه‌زیزئۆغلۆ سه‌رۆكی ئه‌نجوومه‌نی زانكۆكانی نێوده‌وڵه‌تی و كه‌سایه‌تی دیاری وڵاتی توركیا خۆشحاڵی خۆی بۆ میواندارییه‌كه‌ی زانكۆی سه‌لاحه‌دین ده‌ربڕی و گوتی: له به‌ره‌وێشبردنی خوێندن و به‌رزكردنه‌وه‌ی ئاستی زانستی عێراق به‌گشتی و هه‌رێمی كوردستان به‌تایبه‌تی و وڵاتی توركیا، ده‌ستپێشخه‌ر ده‌بین و په‌ره به‌و په‌یوه‌ندییه مێژوویی و زانستییه ده‌ده‌ین كه چه‌ندین ساڵه بناغه زانستیمان بۆ داڕشتووه. هه‌ر له درێژه‌ی كۆبوونه‌وه‌كه‌دا سه‌رۆكی زانكۆكانی میوان به پێشنیار و گفتوگۆی زانستی، راو سه‌رنجیان خسته‌ڕوو.
شایه‌نی باسه له كۆبوونه‌وه‌كه‌دا هاكان قه‌راچی كونسوڵی گشتی توركیا له هه‌رێمی كوردستان و شاندێكی یاوه‌ری له كۆبوونه‌وه‌كه‌دا به‌شداربوون.
