سەرۆکى زانکۆى سەلاحەددین سەردانى سەنتەرى توێژینەوەى زانکۆى سەلاحەددین کرد.
د.ئەحمەد ئەنوەر دزەیى سەرۆکى زانکۆى سەلاحەددین لەدیوانى سەرۆکایەتى زانکۆدا پێشوازى لەشاندێکى زانکۆى جیهان لە هەولێر کرد، کە پێکهاتبوو لە د.ئەمجەد سابیر سەعید سەرۆکى زانکۆى جیهان و شاندى یاوەرى، ئەمەو لە دانیشتنێکدا باس لەچەندین خاڵ کرا، کە دەکرێ هەردوو لا جەختى لێبکەنەوە و ببێتە خاڵى هاوبەشى هەردوو لا و بتوانن لەم رێگەیەوە چەندین پرۆژەى هاوبەش ئەنجام بدەن، هەر لەوێدا
رێککەوتنامەیەک واژوو کرا لەنێوان هەردوو زانکۆدا، بۆ زیاتر پتەوکردنى پەیوەندییە لەرووى بەرنامە هاوبەشەکان و هەموو زانکۆکانى کوردستان بە حکومى و ئەهلییەوە بتوانن هاوکارى یەکتر بکەن و بەرنامە و پرۆژە هاوبەشەکان، سەرۆکى زانکۆ ئەوەشى خستە روو، کە ئەو جۆرە رێککەوتنانە ئاسۆیەکى روونترە بۆ هەردوو زانکۆ لەهەموو بوارە زانستییەکان لەم رێگەیەوەش هەردوو لا ;سوودى زانستى و ئەکادیمى وەردەگرن.
لەلایەکى دیکەوە د.ئەحمەد ئەنوەر دزەیى سەرۆکى زانکۆى سەلاحەددین لەسەردانێکدا بۆ سەنتەرى توێژینەوەى زانکۆى سەلاحەددین سەنتەرەکەى بەسەرکردەوە و لەنزیکەوەش لەگەڵ کارمەندانى سەنتەرى توێژینەوە باسیان لەو ئامێرە نوێیانە کرد، کە لەماوەیەکى نزیکدا بۆ سەنتەرى توێژینەوە دانراوە و لەم رووەوەش قۆتابیانى ماستەر و دکتۆرا دەتوانن سوودێکى زۆرى لێوەربگرن بۆ ئەوەى توێژینەوەکانیان بەباشترین شێوە رایى بکەن و ئەنجامى باش بەدەست بێنن لەرێگەى ئەو ئامێرانەوە، بەتایبەتى بۆ قوتابیانى ماستەر و دکتۆراى بەشە زانستییەکان، هاوکات لەسەنتەرى توێژینەوە باس لەو ئامێرانە کرا و جەخت لەوە کرایەوە، کە قوتابیان و ئەوانەى توێژینەوەیان هەیە دەتوانن سوودێکى زۆر لەو ئامێرانە وەربگرن.
لەنێوەندى ئەو چالاکییانەدا سەرۆکى زانکۆى سەلاحەددین پێشوازى لەشاندێکى ژمێریارانى وڵاتانى عەرەبى کرد، کەپێکهاتبوو لە محەمەد عەبدولعەزیز وەک نوێنەرى یەکێتى ژمێریارانى عەرەب و شاندى یاوەرى ئەمەو لەدانیشتنێکدا هەموو ئەو باس و خواستانە خرایە روو، کە پەیوەندارە بەژمێریارى ، هاوکات سەرۆکى زانکۆ باسى لەو خاڵانەکرد کە چۆن بتواندرێ لەرێگەى خول و راهێنانەکان قوتابیانى بەشى ژمێریارى بابەتە تیۆرییەکان بکەن بەکردەیى، هەروا باس لەپەیوەندى نێوان زانکۆى سەلاحەددین و زانکۆ عەرەبییەکان کرا، لەلایەکى دیکەوە سەرۆکى زانکۆ هەموو هاوکارییەکى خستە روو بۆ سەرکەوتنى کارەکانیان.
