به‌ناوی خودای گه‌وره و میهره‌بان
خوشك و برایانی كوردانی فه‌یلی له قوتابییان و مامۆستایان و فه‌رمانبه‌رانی زانكۆی سه‌لاحه‌دین له یادی چل و چواره‌مین سالیادی جینۆسایدی كوردانی فه‌یلی به ڕيز و شكۆوه شه‌هيدان و قوربانييانى كوردانى فه‌يلى و ته‌واوى شه‌هيدانى كوردستان به بير ده‌هێنينه‌وه، سه‌رى ڕێز و نه‌وازشيان بۆ داده‌نه‌وێنین و ڕۆل و پێگه‌ی كوردانی فه‌یلی قۆناغه جیاجیاكانی خه‌باتی گه‌لی كوردستان به‌رز ده‌نرخێنم.
كوردانی فه‌یلی به‌كردار كوردایه‌تی خۆیان سه‌لماندووه و به‌شداری شۆڕشه‌كانی كوردیان كردووه، بۆیه دژایه‌تیكردنیان هه‌میشه له‌به‌رنامه و پیلانی دوژمنانی گه‌له‌كه‌مان هه‌بووه، جینۆسایدكردنی كورده فه‌یلییه‌كان درێژكراوه‌ی ئه‌و زنجیره تاوانانه بوو كه له لایه‌ن ڕژێمه یه‌ك له‌دوای یه‌كه‌كانی عێراق دژی گه‌لی كورد ئه‌نجامدراون، ئه‌و تاوانه گه‌وره‌یه‌یش كه ده‌رهه‌ق به كوردی فه‌یلی كرا ته‌نیا له‌به‌ر كوردبوونیان بوو.
ئه‌م تاوانانه‌ی كه ده‌رهه‌ق به‌كوردی فه‌یلی كراون به‌پێی پێوه‌ره یاسایی و نێوده‌وڵه‌تییه‌كانی مافی مرۆڤ ده‌چنه خانه‌ی تاوانی دژ به‌مرۆڤایه‌تی و تاوانی جه‌نگ و پاشان تاوانی جینۆساید، چونكه نیه‌تی له‌ناوبردنی فه‌یلییه‌كان به به‌رنامه بووه، گرتن و كوشتن و شوێن بزركردن و كۆچی زۆره‌ملێ و ده‌ست به‌سه‌رداگرتنی ماڵ و موڵكی خه‌ڵكانێك كه نه‌ژاد یان ئاینی جیاوازیان هه‌بێت. خۆی له‌خۆیدا تاوانی جینۆساید ده‌سه‌لمێنێت.
له كۆتاییدا، ئه‌و تاوانه زوڵم و ناهه‌قییه‌كی گه‌وره بوو دژی گه‌له‌كه‌مان و برینێكه كه هه‌رگیز له یاد ناچێت.
پ.ی.د.كامه‌ران یونس محمدئه‌مین
سه‌رۆكی زانكۆی سه‌لاحه‌دین-هه‌ولێر.
