ژماره‌یه‌ك له زانكۆكانی ئه‌وروپا سه‌ردانی زانكۆی سه‌لاحه‌دینان كرد
به‌مه‌به‌ستی ئه‌نجامدانی چه‌ندین توێژینه‌وه‌ی جیاجیای زانستی، ژماره‌یه‌ك له قوتابیانی چه‌ند زانكۆیه‌كی ئه‌وروپی به‌هاوبه‌شی له‌گه‌ڵ شاندی یه‌كێتی قوتابیانی كوردستان، سه‌ردانی سه‌رۆكایه‌تی زانكۆی سه‌لاحه‌دینیان كرد و له‌لایه‌ن دكتۆر جه‌وهه‌ر فه‌تاح سه‌عید سه‌رۆكی زانكۆی سه‌لاحه‌دین به وه‌كاله‌ت پێشوازیان لێكرا.
له دیداره‌كه‌دا كه یاریده‌ده‌ری سه‌رۆكی زانكۆ بۆ كاروباری زانستی ئاماده‌بوو، سه‌رۆكی زانكۆ كورته‌یه‌كی ده‌رباره‌ی زانكۆی سه‌لاحه‌دین و پێكهاته‌و ژماره‌ی كۆلیژو به‌شه‌كانی بۆ شاندی میوان پێشكه‌ش كرد.هه‌روه‌ها تیشكی خسته سه‌ر ئه‌و په‌یوه‌ندییه ئه‌كادیمیی و زانستییانه‌ی كه زانكۆی سه‌لاحه‌دین له‌گه‌ڵ زانكۆكانی دیكه‌ی جیهانیدا هه‌یه‌تی به‌تایبه‌تی له بواری ئه‌نجامدانی توێژینه‌وه‌ی زانستی و گۆڕینه‌وه‌ی قوتابیانی خوێندنی باڵا و چه‌ندین بواری دیكه. هه‌روه‌ها سه‌رۆكی زانكۆ ئاماژه‌ی به پاڵپشتییه دارایی و مه‌عنه‌وییه‌كانی حكومه‌تی هه‌رێمی كوردستان به‌رامبه‌ر به زانكۆكان كرد، به‌تایبه‌تی له كاتی شه‌ڕی دژ به
تیرۆرستانی داعش و دوای له‌ناوچوونی داعش، زانكۆی سه‌لاحه‌دین باوه‌شی بۆ قوتابیانی شاره‌كانی دیكه‌ی عێراق كرده‌وه و له زانكۆی سه‌لاحه‌دین درێژه‌یان به خوێندندا.
له به‌رامبه‌ردا شاندی میوان خۆشحاڵی خۆیان به‌و سه‌ردانه ده‌ربڕی و هیواخوازبوون ببێته خاڵی به‌هێزی دروست بوونی په‌یوه‌ندییه ئه‌كادیمییه‌كانیان له‌نێوانیاندا.
