هه‌واڵه‌كان

کۆنفرانسی بازرگانی زێڕ لەهەرێمی کوردستان و عێراق لە ھۆتێل ڕۆتانای شاری ھەولێر بەسەرپەرشتی وەزارەتی بازرگانی و پیشەسازی بەڕێوەچوو بۆ تاوتووێکردنی بازرگانی زێڕ لە ھەرێمی کوردستان و عێراق، ئەمەو لەم کۆنفرانسەدا  بەرپرسانی حکومی و شارەزایان و ئەکادێمێستەکان و بەشێک لە کۆمپانیا ناوخۆییەکان و لە ناویان زانکۆی سەلاحەددین-هەولێر، وەک تاکە ناوەندی ئەکادیمی سپۆنسەری کۆنفرانسەکە بەشداربوو. 

هاوکات کۆنفرانسەکە لە سێ پانێلی سەرەکی پێکھاتبوو ، بە گشتی تەوەرەکان تایبەت بوون بە گرنگی بازرگانی کردن بە زێڕ لەرووی  داھات و باج رسوماتەوە.

ھەروەھا ھەڵسەنگاندنی ئەم بازرگانییە لە رووی شەریعەتی ئیسلامەوە، هاوکات چۆن بتوانین ھەرێمی کوردستان بکەینە ناوەندێکی گرنگی بازرگانی ئەم کانزایە بە نرخە و ھاوشانی بازاڕە نێودەوڵەتییەکان چالاکی بکەین، ئەمەش گرنگییەکی زۆری ھەیە لە ڕووی ئابوورییەوە. 

ئەمەو د. جوان سەعید مامۆستا لە کۆلێژی ئابووری و بەڕێوەبردنی زانکۆی سەلاحەدین پانێلی دووەمی کۆنفرانسەکەی بەڕێوەبرد و پرسی پانێلەکە تایبەت بوو بە ھەڵسەنگاندنی ئەم بازرگانییە لەرووی شەریعەتی ئیسلامەوە، چەندین بۆچوون خرایە روو سەبارەت بەوەی و چی بکرێت تا باشتر ئەو پرسە ڕێکبخرێتەوە.

پانێلی سێیەم لەلایەن ھەرێم ڕێبوار رێکخەری کۆنفراسەکە و ھاوکات مامۆستا لە کۆلێژی زانستە سیاسییەکانی زانکۆی سەلاحەددین بەڕێوەچوو،  ئەم پانێلەش تایبەت بوو بە چۆنیتی بەستنەوەی ھەرێمی کوردستان لەگەڵ بازاڕە جیهانییەکان و سوود وەرگرتن لە شێوازی نوێی مامەڵەکردن، لە ئێستاشدا لە بۆرسە جیهانییەکان پەیرەودەکرێت بە ئامانجی زیاتر چالاککردنی ئەم بازرگانییە لە ھەرێمی کوردستان.

کۆنفرانسەکە لە کۆتایدا بە کۆمەڵێک سەرنج و راسپاردە و پێشنیار کۆتایی ھات، ئەمەو وا بریارە دەرەنجامەکانی بکرێتە راپۆرتێک و ئاراستەی لایەنی پەیوەندیدار بکرێت.