بە چاودێری نێچیرڤان بارزانی سەرۆكی حكومەتی هەرێمی كوردستان، زانكۆی سەلاحەدین كاتژمێری شەشی ئەمڕۆ ئێوارە ئاهەنگی دەرچوونی خولی 37 ەمینی خۆی لە یاریگەی نێو دەوڵەتی فرەنسۆ هەریری لە هەولێر ساز دەكات، بەم بۆنەیەوە د. ئەحمەد دزەیی سەرۆكی زانكۆ لە لێدوانێكی تایبەتیدا پیرۆزبایی خۆی ئاراستەی دەرچووان كردو گوتی : ئەمساڵ وێڕای هەموو ئەو ئاستەنگانەی هاتنە پێشەوە، مامۆستایان و قوتابیانمان بە رۆحێكی زانستی و نیشتمانی گەورەوە بەردەوامییان بە خوێندن داو بۆ تەنیا رۆژێكیش خوێندن لەو زانكۆیەدا نەوەستا، هەموو هەوڵی خۆمان بۆ ئەوە خستە گەڕ كە نەك هەر تەنها كوالیتی زانستی و مەعریفی ئەمساڵی خوێندن بپارێزین، بەڵكو لە جاران بە گوڕ تر كار بۆ بە زیندوو راگرتنی زانكۆ بكەین و پەیوەندییەكانمان لە گەڵ زانكۆ جیهانییەكاندا پەرە پێ بدەین و توێژینەوەی مامۆستایانمان زێتر بكەین، ئەوەتا جێی شانازییە ئەنجامەكانیش موژدە بەخشن و جێگەی شانازیمانن .
هەروەها سەرۆكی زانكۆ گوتی : بۆ ئەمساڵ كۆی گشتی بەشداربووان لە تاقیكردنەوەكاندا 6124 قوتابی بوو، 3814 قوتابی لە قۆناغی یەكەمدا سەركەوتنیان بە دەست هێنا، رێژەی دەرچوون بە گشتی 6227لە سەدا بوو،كە پێمان وایە ئەو رێژەیە لەو هەلو مەرجە سەختەدا رێژەیەكی سەركەوتوو بووە .
هەروەها سەرۆكی زانكۆ ئاواتی ئەوەی خواست كە ئەو دەستە قوتابیە زانست خوازانە بتوانن سوود لە ئەزموونە زانستی و مەعریفیەكانیان وەرگیرێ بۆ بونیاتنانی كۆمەڵگەیەكی مەدەنی و كاریگەری خۆیان هەبێ لە گۆڕانكارییەكان و بەرەو پێشەوە بردنی كۆمەڵگا و ئاوەدانكردنەوەی كوردستان و گەشە پێدانی سێكتەرە جومگەییەكانی، بە رەخساندنی هەلی كارو بەرجەستە كردنی توانستەكانیان .
