بە ئامادەبونی دکتۆر پشتیوان سادق وەزیری پەروەردەی حکومەتی هەرێمی کوردستان و ئەندامی ئەنجوومەنی پەروەردەو خوێندنی باڵای هەرێمی کوردستانو دکتۆر ئەحمەد ئەنوەر دزەیی سەرۆکی زانکۆی سەلاحەدین و دکتۆر ئەحمەد ئۆزتاش سەرۆکی زانکۆی ئیشق و ژمارەیەک لە سەرۆک زانکۆ تایبەتەکان و سەرۆک بەشەکانی هەردوو زانکۆی سەلاحەدین و ئیشق و ژمارەیەکی بەرچاو لە مامۆستایان و توێژەرانی بیانی و ناوخۆیی لە بواری پەروەردەیی و زمان، هەردوو زانکۆی سەلاحەدین و زانکۆی ئیشق بە هاوبەشی شەشەمین کۆنفڕانسی VESALزانستی پەروەردەیی و زمان لە بارەی بابەتە پەروەردەییەکانی فێرکردنی زمان سازکرد، کە بۆ ماوەی دوو رۆژ لە شاری هەولێر بەردەوام دەبێت و تیایدا نزیکەی شەست توێژینەوە پێشکەش دەکرێت لەسەر ئاستی زانکۆ ناوەخۆیی و بیانیەکان. لە کۆنفرانسەکەدا هەریەک دکتۆر پشتیوان سادق وەزیری پەروەردەی حکومەتی هەرێمی کوردستان و دکتۆر ئەحمەد ئەنوەر دزەیی سەرۆکی زانکۆی سەلاحەدین و دکتۆر ئەحمەد ئۆزتاش سەرۆکی زانکۆی ئیشق وتاریان پێشکەش کرد و جەختیان لەسەر پێشەوەبردنی پڕۆسەی پەروەردە و خوێندنی باڵاو پێشخستنی ئاستی فێرکردنی زمان لە روانگەی فەلسەفەی تازەوە کردەوە، لەلایەکی دیکەوە ئاماژەیان بەوە دا کە دەبێت لە رێگەی ئەو توێژینەوانەی پێشکەش دەکرێن نەخشەرێگەی سەردەمیانە بخرێتە ڕوو تا ببنە هەوێنی رێڕەوێکی نوێتر بۆ ئاسۆیەکی رۆشنی پەروەردەیی لە هەرێمی کوردستان.
شیاوی باسە ئەو کۆنفرانسە ساڵانە ئەنجام دەدرێت، کە تیایدا ئامانج لێی کۆکردنەوەی توێژەران و پەروەردەکاران و پسپۆڕانی ئەکادیمیە لە بوارەکانی تایبەت بە وانەبێژی پەروەردەیی و فێرکردنی زمان تا لە رێگەی ئەزمونی تێوەری و پراکتیکەوە بتوانرێت پەرە بە رەوشی پەروەردەیی لە هەرێمی کوردستان بدرێت.
٢٠١٥/٤/٢٧
