د.يوسف گۆران ڕایگەیاند: پەیوەندییەکانى نێوان کوردستان و ئێران مێژوەیەکى قوڵى هەیەو لە سەردەمى شۆڕشى کوردییەوە تا دامەزراندنى حکومەتى هەرێمى کوردستان، کۆمارى ئیسلامى ئێران پاڵپشتى شۆڕش و گەل و حکومەتى کوردستان بووە، لە ڕابردودا پەیوەندییەکانى نێوانمان زۆربەى لایەنەکانى گرتبوەوە جگە لە خوێندنى باڵا، بەڵام خۆشبەختانە ئەوا خەریکە بەردى بناغەى ئەو پەیوەندییەش داڕێژرا.
ئەو ڕاگەیاندنەى د.یوسف گۆران وەزیرى خوێندنى باڵا و توێژینەوەى زانستى هەرێمى کوردستان لە میانەى دیدارێکیدا لەگەڵ د.محمد فەرهادى وەزیرى زانست و توێژینەوەو تەکنەلۆجیاى کۆمارى ئیسلامى ئێران هات، کە لە ڕۆژى دووشەممە، ڕێکەوتى (٢٤.٤.٢٠١٦) لە دیوانى وەزارەت لە تارانى پایتەخت بەڕێوەچوو.
لەو دیدارەدا. د.محمد فەرهادى ڕایگەیاند: دواى گەڕانەوەى وەفدەکەمان لە کوردستان، خۆشحاڵ بون بەو کارانەى کە ئەنجامیان دابوو، ئەوەش بووە مایەى خۆشحاڵى من کە لەگەڵ هەرێمى کوردستان لە بوارى خوێندن و توێژینەوە هاوکارى و هەماهەنگى لەگەڵ یەکتر بکەین، ڕونیشیکردەوە کە سەرجەم زانکۆکانى کۆمارى ئیسلامى پێیان خۆشە پەیوەندییەکانیان لەگەڵ هەرێمى کوردستان فراوان بکەن، بەهەمان شێوە زانکۆکان بەپەرۆشن کە زەمالەى خوێندن پێشکەش بە خوێندکارانى هەرێمى کوردستان و زانکۆکان بکەن، هەروەک خۆشحاڵى خۆشى بەئەنجامى کۆبونەوەکانیان لەگەڵ زانکۆکانى کۆمارى ئیسلامى ئێران نیشاندا کە لە دیوانى وەزارەتى زانست و توێژینەوەو تەکنەلۆجیا بەڕێوەچوو. ئەوەشى ڕاگەیاند: زانکۆکانى کۆمارى ئیسلامى ئێران لە بوارى توێژینەوەو تەکنەلۆجیا زۆر باشن و هیواى خواست سود لە ئەزمونەکانیان وەربگرن.
لە بەشێکى دیکەى دیدارەکەدا کە د.سالار ئامولى بریکارى وەزارەتى زانست و توێژینەوەو تەکنەلۆجیا و سەرۆکى زانکۆکانى کوردستان و ژمارەیەک لە زانکۆکانى کۆمارى ئیسلامى ئێران ئامادەیبون، د.یوسف گۆران وەزیرى خوێندنى باڵا و توێژینەوەى زانستى هەرێمى کوردستان دواى ئەوەى خۆشحاڵى خۆى بەو پێشوازییە گەرمە پیشاندا، وتى: پەیوەندییەکانى نێوان هەرێمى کوردستان و ئێران پەیوەندییەکە ڕەگێکى مێژوى قوڵى هەیە، لە قۆناغە مێژوییە جیاکان ئێران هاوکارى شۆڕش و حکومەتى هەرێمى کوردستانى لە هەموو بوارەکاندا کردوە، بەڵام کەمتر لە بوارى خوێندنى باڵا و توێژینەوەى زانستى بووە، بۆیە ئەخوازین ئەمە سەرەتاییەکى باش بێت بۆ ئەو هاوکارییە.
د.یوسف گۆران ئەوەشى ڕاگەیاند: کە وەک هەرێمى کوردستان دەخوازن سود لە ئەزمونى سەرکەوتى کۆمارى ئیسلامى ئێران وەربگرن بەتایبەت لە بوارى پزیشکى، تەکنیکى، ئەندازیارى. وەزیرى خوێندنى باڵا و توێژینەوەى زانستى وتى سەربارى ئابڵوقەى ئابورى، بەڵام ئێران توانى پشت بەخۆى ببەستێت و پێشکەوتنى گەورە لە بوارى تەکنەلۆجیا و زانست بەدەست بهێنێت. ئەوەشى ڕاگەیاند: ئەم پەیوەندییانەى کە ئەمڕۆ بناغەکەی چوە بوارى جێبەجێکردنەوە ئایندەیەکى گەشى دەبێت و، وەک حکومەت و وەک وەزارتیش پێمان خۆشە ئەو پەیوەندییانە بەهێز و پتەوتر بکەین، بۆیە بەهۆى ئەوەى نیازى هەردوو لا باشە، ئایندەى پەیوەندییەکان زۆر باش دەبینم.
لە کۆتایى دیدارەکەشدا بڕیار لەسەر پێکهێنانى کۆمیتەیەکى هاوبەشى هەمیشەى درا، بۆ بەدواداچون و جێبەجێکردنى خاڵەکانى ڕێکەوتنامەکەو ئەو بابەتانەى بڕیارییان لەسەر دراوە، هەروەک کۆمیتەکە کار دەکات بۆ فروانکردنى بازنەى پەیوەندییەکان و بەردەوامپێدانیان لە داهاتودا.
لە کۆتیشدا د.یوسف گۆران وەزیرى خوێندنى باڵا و توێژینەوەى زانستى تابلۆیەکى هونەرى شێوەکارى خوێندکارانى کۆلێژى هونەرى زانکۆى سلێمانى کە گوزارشتى لە ئاوارەیى کورد دەکرد پێشکەش وەزیرى زانست و توێژینەوەو تەکنەلۆجیاى ئێرانى کرد، لەگەڵ تابلۆیەکى زانکۆى سەڵاحەددین کە گوزارشتى لە قەڵاى دێرینى هەولێر دەکرد بەهەمان شێوە پێشکەشى د.محمد فەرهادى کرد.
بەروار :٢٠١٦/٤/٢٧
