کۆلێژی ئەدەبیات

کۆلێژی ئه‌ده‌بیات

 

کۆلێژی ئه‌ده‌بیات یه‌کێکه‌ له‌کۆلێژه‌ دیارو به‌رچاوه‌کانی زانکۆی سه‌لاحه‌دین و له‌ریزی کۆلێژه‌ بایه‌خداره‌کانی ئه‌و زانکۆیه‌ حسێب ده‌کرێت و مێژووێکی دوورو درێژی پڕ له‌ به‌خشش و لێهاتوویی هه‌یه‌، بۆیه‌که‌م جار کۆلێژی ئه‌ده‌بیات له‌ 31/8/1971 له‌زانکۆی سلێمانی له‌شاری سلێمانی کرایه‌وه‌، ئه‌وکات ته‌نیا به‌شی کوردی له‌خۆگرتبوو، پاشان که‌ له‌ساڵی 1981 گوازرایه‌وه‌ شاری هه‌ولێر و ناوی زانکۆکه‌ له‌ زانکۆی سلێمانییه‌وه‌ گۆڕا بۆ زانکۆی سه‌لاحه‌دین ئه‌وکات کۆلێژی ئه‌ده‌بیات له‌سێ به‌ش پێکهات که‌ به‌شه‌کانی  زمانی کوردی و زمانی عه‌ره‌بی و به‌شی کۆمه‌ڵناسی بوو، پاشان له‌ساڵی خوێندنی (1985-1986) هه‌ردووبه‌شی مێژوو و ئینگلیزی بۆ زیادکراو له‌ساڵی خوێندنی (1986-1987) به‌شی جوگرافیای لێ کرایه‌وه‌، ساڵی خوێندنی (1995-1996) به‌شی خوێندنی ئیسلامی تێداکرایه‌وه‌، ئینجا ساڵی خوێندنی (1998-1999) به‌شی زمانی فارسیش کرایه‌وه‌، هه‌روه‌ها بۆ ساڵی خوێندنی (2001-2002) به‌شی شوێنه‌وارو به‌شی ئینگلیزی ئێواران کرانه‌وه‌.

بۆ ساڵی خوێندنی(2002-2003) له‌ هه‌ریه‌ک له‌به‌شه‌کانی کۆمه‌ڵناسی و کوردی و مێژوو و جوگرافیا لقی ئێواران کرانه‌وه‌.

ساڵی خوێندنی (2003-2004) یش به‌شی وه‌رگێڕان و زمانی عه‌ره‌بی ئێواران کرانه‌وه‌

به‌م پێیه‌ ده‌بینین له‌ ته‌مه‌نی خۆیدا کۆلێژی ئه‌ده‌بیات گۆڕانکاری و پێشکه‌وتن و ده‌وڵه‌مه‌ندی به‌رچاوی به‌خۆیه‌وه‌ بینیووه‌..

پاش ئه‌و فراوانبوون و گه‌شه‌سه‌ندنه‌ی کۆلێژی ئه‌ده‌بیات واکه‌وته‌وه‌ که‌( کۆلێژی زمان)ی لێ جیاببێته‌وه‌و له‌ساڵی 2004-2005 ناوی کۆلێژی ئاداب گۆڕدرا بۆ کۆلێژی ئه‌ده‌بیات ، ئێستا کۆلێژی ئه‌ده‌بیات له‌ هه‌شت به‌ش پێکدێت که‌بریتین له‌ ( به‌شی کۆمه‌ڵناسی ،به‌شی جوگرافیا، به‌شی مێژوو، به‌شی شوێنه‌وار، به‌شێ راگه‌یاندن، به‌شی فه‌لسه‌فه‌، به‌شی کاری کۆمه‌ڵایه‌تی، به‌شی ده‌روونزانی ).

له‌کۆلێژی ئه‌ده‌بیاتدا ساڵی خوێندنی 2014-2015 ژماره‌ی قوتابیان (2913) قوتابی بوون..